Директорот на јавното претпријатие за државни патишта Ејуп Рустеми и министерот за транспорт и врски Благој Бочварски извршија увид во градежните активности кои се извршуваат на рехабилитацијата на државниот пат А2 делница Куманово-Страцин, втора фаза.
![](https://roads.org.mk/wp-content/uploads/2021/03/slika1-1024x682.jpg)
„Денеска сме овде да го проследиме прогресот во одвивањето на градежните активности на втората фаза на делницата Куманово-Страцин. Станува збор за делница долга 16,64 км со променлива ширина од 7 до 10 метри. Овој проект е финансиран од Буџетот на ЈПДП и неговата вредност е во висина од 7,2 милиони евра. Ќе се изврши рехабилитација на комплетната коловозна конструкција со асфалтирање во два слоја и санација на 3 моста и 10 плочести пропусти. Конечно во блиска иднина ќе заврши маката и голготата за жителите од овој регион, и овој пат којшто е стар 30-тина години ќе биде квалитетно рехабилитиран и реконструиран за да биде долговечен бидејќи овде има фреквенција на тежок соообраќај“, изјави по увидот директорот на Јавното претпријатие за државни патишта Ејуп Рустеми.
![](https://roads.org.mk/wp-content/uploads/2021/03/slika2-1024x682.jpg)
Тој информираше дека во моментов се работи на повеќе локации каде на дел од нив се асфалтира, а на дел се вршат останати градежни зафати. Предвидениот рок за завршување на рехабилитацијата е во август оваа година.
Министерот за транспорт и врски Благој Бочварски рече дека вкупните средства планирани за доизградба и рехабилитација на целиот Коридор 8 надминуваат 700 милиони евра.
![](https://roads.org.mk/wp-content/uploads/2021/03/slika3-1024x629.jpg)
Патниот правец од Куманово до Страцин се реализира во две фази. Инвестицијата е во вкупна вредност од 13 милиони евра, а предвидена е рехабилитација на делницата долга 32 километри. Тоа што е значајно е дека значително ќе ја подобриме безбедноста во сообраќајот на овој државен пат. Во однос на првата фаза од Куманово до с. Војник, веќе имаме избран фирма изведувач, во фаза е изборот за надзор и очекуваме месец март да започне рехабилитација и на оваа делница, така да заедно со директорот целосно сме фокусирани на модернизација на овој Коридор”, изјави министерот за транспорт и врски Благој Бочварски.
Мината година, пак, беше рехабилитиран и реконструиран патот од Ранковце до Крива Паланка во должина од 21 километар и со отпочнатите други рехабилитации, санации и изградби во овој регион ќе добиеме комплетен Коридор 8 кој ќе биде безбеден и сигурен за учесниците во сообраќајот.