Премиерот Никола Груевски  во рамките на неговата посета на општина Кавадарци го пушти во употреба на реконструираниот пат од месноста Ладно Долче кон селата Страгово и Крњево .
– Патот е од секојдневна важност за повеќе села како Страгово, Крњево,  Чемерско, Бохула, Горна и Долна Бошава. Воедно, патот е од посебно значење и за шумското стопанство, локалните земјоделци и лозари, но и за сите граѓани кои одовде се упатуваат кон поволните излетнички места и посебно кон ски центарот Кожуф, нагласи премиерот Груевски, додавајќи дека патот во изминатиот период беше во многу лоша состојба со ширина од 3 метри и со многу нерамнини и дупки.

ФОТО : МИА

– Ние како Влада издвоивме 46 милиони денари со кои се изведе комплетна реконструкција и проширување во должина од околу 5 километри. Градежните активности завршија минатата година и граѓаните веќе ги почувствуваа придобивките од овој пат, рече премиерот Груевски.
Директорот на ЈП за државни патишта Владо Мисајловски  истакна дека локалните правци, иако поврзуваат села и помали региони, се од големо значење за квалитетот за животот во населените места и за регионалниот развој на општините. За да ја подобри локалната патна инфраструктура, општина Кавадарци аплицираше за рехабилитација и реконструкција на неколку локални патни правци и тоа од регионалниот пат 107 до село Ресава, од село Ресава до село Бегниште и локалниот пат Ладно Долче – Крњево – Страгово со вкупна должина од околу 17 километри.