Заврши рехабилитацијата на магистралниот пат Охрид – Св. Наум во должина од 24,4 километри, инвестиција вредна 11,7 милиони евра, средства обезбедени од буџет на Јавното претпријатие за државни патишта.

Директорот на Јавното претпријатие за државни патишта Коце Трајановски во присуство на претстедателот на Владата на РСМ Христијан Мицкоски, вице премиерот и министер за транспорт Александар Николоски, градоначалникот на Општина Охрид Кирил Пецаков, како и во присуство на бројни гости ја ставија во функција оваа значајна делница.

„Сите до еден сме свесни за важноста и значењето на оваа делница која е магистрален пат кој има исклучително регионално значење и важност затоа што претставува патна врска со Република Албанија. За жал, и покрај исклучителната важност цели четири децении оваа делница чекаше за рехабилитација. Еве не денеска сите тука заедно да ја соопштиме оваа убава вест на која децении наназад чекаа и локалните жители кои секојдневно го користат овој магистрален пат, но и добрите патници намерници кои сакаат да го видат бисерот над бисерите на Охридското крајбрежје, комплексот Свети Наум. За сите нив денес имаме побезбеден и рехабилитиран магистрален пат. “-изјави директорот на Јавното претпријатие за државни патишта Коце Трајановски при свеченото ставање во функција на делницата.

Со реконструкцијата заради зголемување на безбедноста во сообраќајот, како и прегледност на патот се изврши растеретување на косини од нестабилен карпест материјал и се монтираше заштитна челична мрежа на косините.

Се постави комплет нова вертикална и хоризонтална сигнализација, односно нови сообраќајни знаци, се изврши означување на хоризонталната сигнализација т.е боење со патарска боја и се постави заради поголема заштита еластичната одбојна ограда.

Инаку, ширината на магистралниот пат е променлива од 5 до 6 метри и поради зголемена видливост и безбедност во сообраќајот, како и заштита на косини од одрони се изврши таканаречено кавање, растеретување на косини од нестабилен карпест материјал.

Со рехабилитација на оваа главна туристичка сообраќајна делница, ја подигнуваме безбедноста во сообраќајот и обезбедуваме квалитетна патна врска од Охрид до манастирскиот комплекс Св. Наум. Исто така, ја подобруваме патната мрежа, го подигнуваме квалитетот на туристичкиот потенцијал и го потикнувме економскиот развој во охридскиот регион.